नेवा: स इन्टरनेट रेडियो

Tuesday, January 28, 2014

घाः

घाः

च्वमि— सुनिता जुनु
(सत्य घटनाया लिधंसाय्)
Published on Baakhan Daboo


अमेरीका थेंजाःगु थाय्, व नं थःगु छेँ मखु, कतपिनिगुली च्वनेमाः । झीगु थाय् थें मखु, पलाःछिउथाय् तकं धेबा पुलेमाः । अमेरिका धायेवं स्वर्ग हे तायेकिपिन्त अथे नं खइला धया थें च्वनेफु।  उथाय् जि मिजंया ज्या । थ्व खँ न्यँना छिं बिचाः यात जुइ । अथेखसाला धन्दा हे मदुनि छित। खँ अथे मखु । अमेरीका जुइवं धलमं दां हायावइगुमखु । उकिंजिं फयागु घाः



— बिन्ति जि म्ह्याय् यात क्वथा माल । छिपिं आः थथें हे हुँ, वना हे छ्वः, छिपिं गन ज्यू अन क्वथा माला च्वं हुँ '। जि मिजंया पासाया कलातं धाल । बूगु जाः ला तानाः नयेत थाकु व नं अमेरिकाय् , धायेवं हे क्वथा गन दइगु, हाकनं उलि अपुइक दइगु थाय् न ला मखुत नि । जि बिबश, च्यादँ दुम्ह म्ह्याय् जि नं, दुने क्वथाय् क्यान्सरया ल्वचं कःम्ह, स्वीगुदँ दुम्ह जि मिजं लासाय् लाना च्वंम्हेसिया मिखां ख्वबि बा वयाच्वन । ज्याय् नियमित हाजिर जुये मफुगु हुनिं अफिस न मन्त। सायद! व पिडा अलय् अज्याःगु बिबशपुर्ण खँ न्यने माल'उकिं, जि मिजंया नुगः साप ख्वः । पला पत्तिकं ध्यबा माथाय्, थौं उया कलाः, मचा व थः म्वाय् त छुं स्रोत न मन्त । वयकलं छुं यायेमफु, न जिं हे छुं यायेफत । न जिं थगु ख्वबि हुयेफत, न वयकयाःगु ख्वबि, ख्वबि बा वनाच्वन'



अमेरिका धायेबलय् तःतधंगु बिल्डिङ जक दइ अन थ्यनेवं हे ज्या न न्ह्याक्वं दइ अलय् धेबा न यक्व'तर थन खँ अथे मखु, मखं पिनेगु नितिं थ्व देश, "ड्रिम ल्यायण्ड" हे जुइफु। भतिचा ब्वना सःस्युपिन्स "ल्यायण्ड अफ अपरच्युनिटी" न धाइ तर अन  अपरच्युनिटी ज्वनेत न गूड अपरच्युनिटी हे माः ।

जिपिं च्वना थाय् सहरं न यक्व तापा, छगू चिकिचाधंगु गां हे खः, अन चिचिखाःगु छेंत दु छगू छगू कोलोनि थें याना दयेका तःगु अलय् ज्या न धायेवं हे गन दइगु खः। जिपिं च्वनागु थाय् अन अप्व नेपालीत डि॰ भि॰ लानाः वयाच्वनाच्वंपिं दु । नेपालय् सरकारी स्तरय् सुब्बा, हाकिम जुया तःतधंगु पोस्टय् च्वना ज्या याना च्वंपिं, डि॰ भि॰ लात धका मख्ख जुया वपिं झी नेपामि दाजुकिजा तकेहेँपिं सकलसिया वहे कि ग्यास स्टेशनय् कि त डिपार्टमेन्ट स्टोरय् क्यासिएर सा गनं सब वेय्, सब रोल दयेकेगु, पिज्जा स्टोरय् पिज्जा डेलिभर या वनेगु, फ्लोर मोब यायेगु निसें ट्वाइलेट तकं न सुचुकुचु यायेगु ज्या यायेत लिचिलि मखु । वहे ज्या याना थःगु इमान स्वाभिमान दक्वं तंका/न्हंका च्वनि । थःयाके दुगु दुःघाः सुयातं कने हे लाःगु मखु, खाली उखे ब्वाँय् जुल थुखे ब्वाँय् जुल । ब्वाँय् जक जुया, नं भातया कला नापं घौपलख खँ ल्हाये ला, नं म्ह्याय् या थः मां यात थःगु छुं खँ प्वंके ला, नं  बौ न थः काय् यात छगुं ब्वनेगु गथे जुयाच्वन धका न्यने ला । सुनां सुंयागु च्यूता कयाच्वनेमलागु थाय् अमेरिका'

जिपिं च्वनच्वना थायया अपार्ट्मेन्टया ल्यूम्नेया न्हायकं याःगु खापा चायेका स्वयां, नं सुं छम्ह की क्व दु, नं मनू हे जुपिं दु, अज्याःगु न्हिनय् हे झिंझाय् मिझाय् दंगु, अमेरिका जक धयां छु याय्? तःधंगु देशय् सुं छम्ह थः मदु, सुं छम्ह थः याय् बहपिं मदु । खाली प्वाः छगः जायेकेया नितिं उखें थुखें ब्वाँय् ब्वाँय् जुजुं लिमलापिं जक । जि मिजं प्यदँ अन च्वनाच्वंगु खसां तबि नं जि न्हूम्ह । सुं न बांलाक्क म्हमस्यू । हाकन सुं छम्ह नापं खँ ल्हाय् मासा, न्हापा हे ई कया तय् माःगु गनं छक्व वना थःगु नुगः खँ ब्याके धाइपिं सुनं मखना ।

हरे शिव! जि मिजंया हालत! फु मफु मधासें चाः न्हिं, नसें मनसें ज्या यायां अनया मास्टर डिग्री कया छगू इन्डियन कम्पनीइ ज्या क्वज्यूगु खुला लिपा वयकया डिपेन्डेन्ट एच्॰ ४ भिसाय् थुगुसी हे जित लायेमाःगु छाय्? न्हापा प्यक प्यक कुतः याना रिजेक्ट जुया च्वंगु, न सायद व भिसा जक मलागु खसां तबि न जि मिजं नेपाः हे लिहा झाइगु खला? न जित न्हापा हे नापं भिसा लाःगु खःसा, जि मिजं यात थ्व ल्वचं मकाइगु खला? खँ मनय् वाः '

खयेतला जि मिजंनं, व पासायात न्हापा याकचा जू बलय् नं लिपा वया कलाः मस्त ज्वना, थन व बलय् नं उमित माःगु क्वथा, गाडी, मोबाइल, फोन, इन्टरनेट दक्वं वयकया हे नामय् कया ग्वाहाली याना तःगु खः। तर थौं न्हापा थें तुं जि मिजंन ग्वाहाली तने मफुगुलिं आः जि मिजं उमिगु नितिं ज्या मवल, दक्वं अःखः जुयाबिल । न्हापा घालय् ध्वइ थें सा, आः ज्यू जक ज्यूसा व हे घालय् चक्कुं त्या त्या याना त्यानाः मल्ता चि हाः याय् मस्तिवः उमि। गुलि याकन मयल, न्हापाला न्ह्यागु छकू जक साःगु ज्वरे जुसां, दाई यात नके धकाः ल्यंका तयागु धयापिं आः स्व, उमिगु पह, जि म्ह्याय् यात क्वथा माल हं, जि मिजं न थःगु प्राण त्वति अलय् थ्व छें उमिसं न त्वता वनेमली धकाः ल्वगिम्ह नापं जीवन हनेत कुचाल, न्ह्याबलें ह्वःह्वः पुइक अलय्  छात्ती हे तज्याई थें च्वंक मुसुतःगु न्यने हे मफुत हँ, किमो थेरापीं छ्यनय्, म्ह्यय् छपु हे सँ मदयेक, हाकुया व गंसि जुया वंगु ख्वाः स्वय् मफु हँ, उकिं छिपिं थनं याकन हे हुँ, आः हे हुँ धकाः सुथ, बहनि लाछिंमलाछिं हे क्वात्तुमतु क्वाइगु ।धायेतला जि मिजं न जित छन्हु  धाःगु खः “जिं फुक्वसित बिश्वासयाना तर सकसिनं जिगु बिश्वासयात आघात यात । जिं सकसित थः हे नाला तर जित सुनां थः मिखां मस्वल, थ्व जिगु तःधंगु हे बिडम्बना खः ।” जि मिजंया व लाचार अलय् बिबशताय् जिं न छुं हे भरोशा तने मफुत । जि छम्ह मदयेवं थुमि छु जुइ धका पिर कया, झं झं हे जि मिजंयात लासां दनेत नं पासा माल, जुजुं अस्पातालया रेगुलर चेक अपय् वंम्ह मनूयात छक्वलं इमरजेन्सी धका भर्ना याना साइनसीन याकाः याकनं याकनं सकशन् पाइप तयेकेत उजं काल, जि मिजंनं उजं बिल, अन सेवा यायेत च्वम्ह नर्सया मिखाय् ख्वबि जायेक तया जित घयेपुल अलय् ह्वाँय् ह्वाँय् ख्वल तर जिं मस्यू कि अज्याःगु पाइप तल धायेवं जि मिजंनं गुब्लें हे न्ववाइ मखु धकाः । नर्स ख्वःगुलिं जि मिजंनं व नर्स यात धाल— डोन्ट वरी, सि इज भेरी ब्रेभ् धकाः पाइप न्हासय् व म्हुतुइ तया द्योनाछ्वल अलय् द्योंम्ह मनू दना मव, न्वः नं मवासें वन, जिनाप नं म्ह्याय् नाप नं । जि मिजं अमेरिकां जक मखु, थ्व संसारं हे बिदा कया वन, जिमिगु संसार शुन्य॰॰॰
(Source : https://www.facebook.com/notes/sunita-junu/%E0%A4%98%E0%A4%BE%E0%A4%83/10152163741731212)

No comments:

Post a Comment