नेवा: स इन्टरनेट रेडियो

The Status of the radio is


Note: Please Click the play button to listen if the status is Live
Refresh the page if live and player is not responding.

Saturday, November 3, 2012

नेपाल संवत् न्हूदँ राष्ट्रिय समारोह समिति–११३३या प्रतिनिधिमण्डलं प्रधानमन्त्री भट्टराईयात नाप लात

Uden Nhusayami 

""थीथी जातिया नेपाःया देय्
नेपाल संवत् ल्यंका तये""


Photo: Nripendra Lal Shrestha
(नेपाल संवत् न्हूदँ राष्ट्रिय समारोह समिति–११३३ पाखें थुगुसी न्हूदँया निंतिं आधिकारीक मूल नारा पित बिउगु दु ।)

प्रधानमन्त्री डा. बाबुराम भट्टराईनं देय्या गौरवया रुपय् दुगु नेपाःया मौलिक संवत् नेपाल संवत्यात नेवाःजक मखु सकलें जानाः प्रवद्र्धन यायेमाःगु खँय् बः बियादीगु दु । वय्कलं देय्या राष्ट्रिय संवत्या रुपय् दुगु नेपाल संवत्यात व्यावहारिक रुपं छ्यलाबुलाय् हयेगु निंतिं तत्काल थःगु थासं याये फइगु छुं नं ज्या दुसा यायेगु जुइ धकाः नं प्रतिवद्धता प्वंकादीगु दु । लिसें थम्हं छ्यलेगु लेटर प्याडय् नेपाल संवत्यात तत्काल छ्यलेगु जुइ धकाः नं बचं बियादीगु दु । 

नेपाल संवत् न्हूदँ राष्ट्रिय समारोह समिति–११३३या छगू प्रतिनिधिमण्डलं प्रधानमन्त्री भट्टराईयात नाप लायेत वय्कःया निवास बालुटारय् वंगु इलय् वय्कलं उगु खँ धयादीगु खः । ‘नेपाल संवत् नेवाः जातिया विशेष स्वयां नं आः राष्ट्रिय संवत् घोषणा जुइ धुंकूगु अवस्थाय् थ्व सकसिगुं मंकाः राष्ट्रिय संवत् खः, नेपाल संवत् देय्या मौलिक संवत् खः, थ्व राष्ट्रं गौरव यायेमाःगु संवत् खः’, प्रम भट्टराईनं धयादीगु दु ।

उगु इलय् नेपाल संवत् न्हूदँ राष्ट्रिय समारोह समिति–११३३ पाखें वय्कःयात थीथी गुंगू बुँदाया ध्यानाकर्षण पौ नं ल्हाःगु खः । ध्यानकार्षण पती च्वयातःगु बुँदा :–
१) नेपाल संवत्यात राष्ट्रिय संवत् घोषणा याये धुंकाः थुकिया सम्मान यायेमाःगु
२) नेपाल संवत्यात व्यवहारय् नं छ्यलाबुलाय् हयेमाःगु 
३) नेपाल संवत्यात तत्काल राष्ट्र प्रमुख व सरकारी निकायं याइगु निर्णय व उगु निकायं छ्यलाबुलाय् हःगु लिखित दस्तावेजय् छ्यलेमाःगु 
४) नेपाःया ध्यबा व सिक्काय नं नेपाल संवत् अंकित यायेमाःगु 
५) शंखधर साख्वाः प्रतिष्ठान स्थापना यायेगु ज्या तत्काल यायेमाःगु
६) नेपाल संवत न्हूदँया नामं सार्वजनिक विदा बीमाःगु
७) नेपाल संवत् राष्ट्रिय संवत् जूगुलिं उगु संवत्या न्हूदँ नेपाल सरकारया नेतृत्वय् मूल समारोह समिति गठन यानाः हना यंकेगु परम्पराया न्ह्याकेमाःगु 
८) नेपाल संवत्या प्रवर्तक शंखधर साख्वाः व नेपाल संवत् सम्बन्धी पाठ्य सामाग्री पाठ्यक्रमय् दुथ्याकेगु व्यवस्था यायेमाःगु 
९) नेपाल संवत् राष्ट्रिय रुपं हनेया निंतिं राज्यपाखें बिस्कं छगू कोषया व्यवस्था यायेमाःगु 

उगु इलय् प्रधानमन्त्री भट्टराईपाखें थम्हं तत्काल याये फइगु ज्या यायेगु प्रतिवद्धता प्वंकादीगु खः । नेपाल संवत्यात सरकार माने यायेत व छ्यलाबुलाय् हयेत तयार दुगु खःसां व्यवहारिक समस्या दयाच्वंगु खँ कनादीगु खः । लिसें नोट व म्वहलय् नेपाल संवत् दुथ्याकेगु खँ तसकं पाय्छि जूगु धासें उकिया निंतिं राष्ट्र बैंक नापं सहलह यायेगु जुइ धयादीगु खः । अथे हे राज्यपाखें कोष नीस्वनेगु निंतिं नं थम्ह पहल यायेगु जुइ प्रम भट्टराईनं धयादीगु दु ।

Source : Uden Nhusayami 

No comments:

Post a Comment