नेवा: स इन्टरनेट रेडियो

The Status of the radio is


Note: Please Click the play button to listen if the status is Live
Refresh the page if live and player is not responding.

Friday, June 20, 2014

'भास म्वासा जाति म्वाइ' भर्सेस 'जाति म्वासा भास म्वाइ'

'भास म्वासा जाति म्वाइ' भर्सेस 'जाति म्वासा भास म्वाइ'

Dr. Roshan Shrestha, USA


स्वीदँ न्ह्य: जि मचाबलय त्वा: त्वालय पुच: निस्वनेगु लहर व:गु इलय जिपिं नं ४म्ह ५म्ह जाना छगू छेलिया क्वथासं 'न्हू पुच:' नाँ छुना जिमिगु पुच: निस्वना । सु पँ चिनेत दयेका: त:गु ख्यूँगु क्वथा सफा याना तार साला बिजुली मत तया जिपिं मुनाबलय जिमिगु उत्साह इपांथिपां मदु । नेपाल सम्बतया र्यालिइ ब्वति कायेगु, 'भिन्तुनाया स: ज्वना न्हू पुच: वइच्वना' धका नारा थ्वयेकेगु जिमिगु त:धंगु रहर । न्हलुवा: मखुसां तबि नेपालभास व नेवा:सभ्यतायात नुगलय ज्वना न्हचिलेगु अभियानय अनं निसें थौं तक जि निरन्तर हे तिनि । अबलय् मचापिनिगु 'न्हू पुच:' स्वना बा:छि निवा: दया वयेवं खँ पिहाँ वल, नां 'न्हू पुच:' मतयेमागु, लिपा पुलां जुया वनेवं 'पुलां पुच:' धायेगुला? छुं ई लिपा व हे 'न्हू पुच:' नां हिला 'ग्वहालि पुच:' जूवन ।
८दँ-१०दँ तस्कं सक्रिय जुया अनं लिपा तीजक दुसुना वन । जिगु उर्बर टिनेजरया अधिकांश ई पाना छ्वयागु ग्वहालि पुचलं जिमित 'भास म्वासा जाति म्वाइ' धैगु शिक्षा कायेगु ह्व:ता: चूलाकुगु ख:। हनेबहम्ह सिद्दिदास महाजुया थ्व धापू सरल खँग्वलं गहन अर्थ थुइकाबिइत तस्कं हे प्रभावशाली जूगु जिं वा: चायेका । ग्वहालि पुच: नापनापं जि न्ह्यज्या: खल:नाप नं ता:ई तक दुथ्याना । न्ह्यज्या: खल:या साँस्कृतिक ज्याझ्व: छगू इलय स्वनिगलय् हे बय् बय् जुइगु । न्ह्यज्या: खल: पाखेँ नियमति प्रस्तूति जुइगु ख्वपया बिराट नेपाल भाषा सम्मेलनया मू धापू नं 'भास म्वासा जाति म्वाइ' हे ख:। अन हे नेमकिसं (थौं कन्हय पार्टी)नाप सत्तिक सक्रिय नेवा:मि पिन्सं नेपालभास त:मुँज्या नं याइगु । त:मुँज्याया धापू धा:सा नारायणमान बिजुक्छेँया बिचालं ह्व:गु 'जाति म्वासा भास म्वाइ' धैगु ख: । थ्व परस्पर बिरोधि धापूया ल्यू ल्यू जुइपिनि दथ्वी नं शत्रु थें सम्वन्ध स्यं ।

जि 'भास म्वासा जाति म्वाइ' धका विश्वास याइम्ह जूगुलिं सुं पासापिन्सं 'जाति म्वासा भास म्वाइ' धाल कि तर्कवितर्क व विबाद जुया हे च्वनिइगु । अज्यागु विवाद घण्टौ घण्टा जूगु लुमन्ति नं दु । बिबाद जुजुं ल्हा व म्हुतु वायेत न्ह्यचिलीपिं नं दु । थौं नीन्यादँ स्वीदँ लिपा वया सु पायछि जुल ले धका स्वयेगु ख:सा न्हापा सिबे यक्व हे आधार, तथ्य व बिश्लेषणया ग्वहालि कया मुल्यांकन याये खनीगु अवस्था दु । थ्व मुद्दायात छगू कथंया स्वच्छ स्वस्थ वैचारीक बहसकथं हे न्हाका: वने फुगु छ्याता कथं नं काये ज्यू ।

'भास'खँग्व:या गुलि स्पष्ट अर्थ दु 'जाति' खँग्व:या मदु । 'जाति' धायेबलय छु ख:? जनसंख्या ख:ला? संस्कार,चालचलन ख:ला? सभ्यता ख:ला? जीवनदर्शन ख:ला? सभ्यता ख:ला? बिनां(थर),थायबाय,लजगा:,धर्म,तजिलजि,विश्वास - छु ख: छु मखु? छु जुल कि 'जाति'इ दुने दुथ्याइ, छु जुल कि 'जाति' पाखें पिथ्याइ? थथे स्पष्ट देफिनिशन 'जाति' खँग्वलं बिइमफु धैगु जित: ता:। स्पष्ट देफिनिशन धाये थाकुसां नं थन न्ह्यब्वयागु निगुलिं धापुतिइ दुगु 'जाति' खँग्व:या छगू हे अर्थ ख: । जाति खँग्व:या व अर्थ धैगु नेवा:पह व नेवा:जीवनदर्शन दइच्वंगु, 'झी नेवा:' धैगु भावना म्वानाच्वंगु जीवन्त समाजया अस्तित्त्व ख: धका जिं थुइका च्वना ।

च्वय् न्हथनाकथं 'जाति'या अर्थ थुइका स्वयेगु ख:सा 'भास म्वासा जाति म्वाइ' धायेबलय नेपालभास म्वाना च्वन धा:सा नेवा:पह व नेवा:जीवनदर्शन दइच्वंगु 'झी नेवा:' धैगु भावना म्वानाच्वंगु जीवन्त समाजया अस्तित्व म्वाना च्वनी धका थुइके फइ । जिं स्वयेबलय थ्व खँ पायछि हे ख:। थौं कन्हय नेपालभास न्हना वनाच्वंगु दु । अथे जुया नेवा:भावना नं म्हो जुजुं वनाच्वंगु दु । नेवा:भासं चलेजुइगु रेडियो, पत्रपत्रिका, फिल्म, ब्यवसाय आदिया बजा: कमजोर जुजुं वनाच्वंगु दु । नेवा: नं नेवा:यात ग्वहालि यायेमा: धैगु भावना मदया वनाच्वंगु दु । लोकया बिचा:यात दक्कलय न्ह्य:ने तइपिं नेवा:त थ:गु परिवारया दुने तक्यना वनाच्वंगु दु । लोकया खँ ला छखे हे तये, गुथियात तकं वास्ता मयायेगु कथं नेवा: समाज हिला वनाच्वंगु दु । नेपालभास मस:पि, मछ्यलिपिं व मयेयकिइपिं मनूतयसं नेवा:समाजया विधिविधान, नियम व संस्कार तोरे याना य:य:थे याना जुइगु ग्यानापुगु बानी अप्वया: वंगु दु । थ्व दक्व संकेतं छु क्यनाच्वंगु दु धा:सा नेपालभासयात वेवास्ता याना वं लिसे नेवा:त पाखें हे 'जाति'या भावना मक्के जुया वन, खिये जुया वन, तुते जुया वन ।

आ: 'जाति म्वासा भास म्वाइ' धैगु गुलि पायछि ले धका छक्व: स्वये । पुलांगु पुस्ताया नेवा:पिनि दथुइ 'जाति' आ:तक नं म्वानाच्वंगु दु, इमिगु दथुइ 'भास' नं म्वनाच्वंगु दनि । तर न्हू पुस्ताया नेवा:पिनि दथुइ भास सिना वनाच्वंगु स्पष्ट खने दत । छगू हे समाजय् ब्वलंपिं न्हू पुस्ता 'जाति'इ दुमथ्या गथे धायेगु? न्हू पुस्तायापिंला जात्रा पात्राय् झन हे सक्रिय । मिसा मिजं दक्व जाना धिमे थाना नेवा:पह: या तिसा वस: पुना पिहां वइबलय अहो गुलि जक बाँला!!! थ्व स्वयेबलय न्हू पुस्ताया दथ्वी नं 'जाति' म्वानाच्वंगु हे दु धका सिइ दु । अथे ख:सा भास जक गथे सिना वंगु? जाति म्वात धा:सा भास यात घ्वासा बिइत तिब: जक जुइफु, तर जातियात म्वाकेवं भास म्वाना च्वनी धैगु ग्यारेण्टी मदइगु जुया च्वन । जित: नुगलय थ्यूगु ला छु धा:सा जात्राय गब्लें नं स्वये मनंगु बोल पिकना धिमे थायेस:म्ह नेवा:मयजुयात 'छिं धिमे था:गु तस्कं बाँला, गन सयेका: दिया? छित: व छिम्ह गुरुयात दुनुगलं निसें लसहना च्वना' धका: धा:वंबलय लिसलय् वयक: मयजु पाखें 'धन्यबाद दाइ, मलाइ नेवारी बोल्न आउँदैन, इहिहि' हँ । जिल ला? 'जाति म्वाना भास म्वातला?'

No comments:

Post a Comment