नेवा: स इन्टरनेट रेडियो

The Status of the radio is


Note: Please Click the play button to listen if the status is Live
Refresh the page if live and player is not responding.

Saturday, March 9, 2013

"थौंकन्हय् नेवाः तयेगु स्थिति व नेवाः सञ्चारकःमि तयेगु भूमिका" नेवाः पत्रकार राष्ट्रिय दबूया सहलह ज्याझ्वः जिगु मिखाय्


"थौंकन्हय् नेवाः तयेगु स्थिति व नेवाः सञ्चारकःमि तयेगु भूमिका" नेवाः पत्रकार राष्ट्रिय दबूया सहलह ज्याझ्वः जिगु मिखाय्

सिल्लागा त्रयोदशी, ने.सं. ११३३ अथे धैगु २६ फागुन २०६९, यलः । नेवाः पत्रकार तयेगु राष्ट्रिय संगठन "नेवाः पत्रकार राष्ट्रिय दबू" निदँ दुगुया लसताय छगु सहलह ज्याझ्वः यलया अक्षेश्वरमहाविहार, पुचोलय् जुल । "थौंकन्हय् नेवाः तयेगु स्थिति व नेवाः सञ्चारकःमि तयेगु भूमिका" विषयलय जूगु उगु ज्याझ्वःलय् नेवाः पत्रकारिता क्षेत्रय ज्याःयाना च्वपिं अनुभव दुपिं भाजुमयजुपिं, नेपालभाषाया ख्यलय् ज्यासना च्वपिं व एफएम न्यनामि भाजुमयजु पिनिगु उपस्थिति दुगु खः । उगु ज्याझ्वलय ब्वतिकया दिपिं भाजुमयजुपिन्त भाजु सुरजविर बज्राचार्यजुं लसकुस याना दिगु खःसा मयजु मञ्जु बज्राचार्यजुं ज्याझ्व न्ह्याकादिगु खः । 

उगु सहलह ज्याझ्वःलय् सन्ध्या टाइम्स् न्हिपौया सम्पादक भाजु सुरेश मानन्धरजुं छापा पत्रकारिताय् नेपालभाषां व खस भाषां नापं पला न्ह्याकुगु खः सां आःवया थौकन्हय् खस भाषाया छापा पत्रकारिताया गुलि विकास जूगु खः उकिया ल्याखय् नेपालभाषां जुइ मफया च्वन धया दिल । नेवाः तयगु जनसंख्या वृद्धिदर मेमेपिं समुदाय सिवें म्हो जूगु तथ्याङ्क पिदंगु व उकिसिनं नेपालभाषां खँ ल्हाइपिं नेवाः त अझ म्हो जूगुलिं नेपालभाषाया छापा, एफएम व टेलिभिजन पत्रकारिताय बामलागु लिच्वः लाना च्वंगु दु धया दिल । नेपालभाषा व नेवाः तयेगु स्थिति बांलाके त आः नेवाः पत्रकार तयसं राज्य पुनर्सरचनाया खँय् पहिचान नापंया संघीयताया पक्ष दनेमागु आवश्यकता दु धयादिल । 

अथेहे उज्यालो नेटवर्कया व्यवस्थापन पाखें मयजु मन्टेश्वरी राजभण्डारीजुं एफएमय् नेपालभाषाया ज्याझ्वःयात कया कना दिसें यक्को धैथे ज्याझ्वःया आर्थिक व व्यवस्थापकीय पक्ष बल्लाके मागु धया दिल । वयक न ज्याझ्वः प्रस्तोतां भाषिक शुद्धताय् च्यूता कायेमागु खँ न न्ह्यथना दिल । उकिं एफएम रेडियोलय् छगु भाय् स्यनेगु ज्याझ्वः तयेदुसा बाँला धया दिल । उबले वयक न नेपालभाषा ज्याझ्वः गुलित स्तरीय जू व उकिं न्यनामिपिन्सं गुलि शिक्षा कया च्वंगु दु धैगु छगु सर्वे न यायेमागु खः धया दिल । नेपालभाषां एफएम ज्याझ्वः स्वनिग दुने जक  न्ह्याना च्वंगु व स्वनिग पिने लगभग शून्यया स्थिति दूगु व थपिन्स पिने न मेमेगु रेडियो स्टेशनय ज्याझ्व रिले यायेत कुतः यानागु जुसां सफल मजुगु खँ धया दिल । 

अथेहे सिने पत्रकारिताय् नाःजाम्ह भाजु विजयरत्न असंबरेजुं नेपालय् टेलिभिजन पत्रकारिताया इतिहास बारे कना दिल । टेलिभिजन छगु सशक्त माध्यम जूगु नि झिसं थुकियात बः बिइमा धया दिल ।  आ वया थीथी टेलिभिजनय् नेवाः ज्याझ्वः न्ह्याका च्वंगु खसां उलि चर्चाय वया च्वंगु मदु धया दिल । ईमेज च्यानलय धासा नेवाः भासं बूखँ, ज्याझ्वः बांलाक्क हे न्ह्याना च्वंगु छगु सन्तोषया विषय खः धया दिल । 

अथेहे अनलाइन पत्रकारिताया बारे नेपालमण्डलडटकमया भाजु अस्मित मल्लजुं अनलाइन पत्रकारितां इतिहास कना दिसें थौकन्हय् छापा, एफएम व टेलिभिजन स्वताःजियात हे कःगाना वने फुगु व थुकिया पाठक तयेसं तुरुन्त हे समाचार ब्वने खनिगु नि थुकि सशक्त भूमिका म्हिता च्वंगु खँ कना दिल । दक्वसिवे लिपागु प्रविधि जुगु नि थुकिया बारे ज्ञां मदुगुनि पत्रकार तयसं बांलाक्क छ्यले मफुगु न कना दिल । 

अथेहे रासस पाखें भाजु राजु शाक्यजुं सरकारी सञ्चारमाध्यमय् समाचार सम्प्रेषण यायेबलय नीजि सञ्चारमाध्यम सिवें बिस्कं हे पाःगु व सत्तापक्षया लिक्क च्वना समाचार सम्प्रेषण यायेमालिगु छगु बाध्यता दु धया दिल । वयक न नेवाः त थीथी ख्यलय थायथासय दूगु जुसां वयकपिन्स अवसरया उपयोग यायेमफुगु वा याये चाहे मजुगु नि नेवाः त लिपा लाना च्वन धया दिल । सरकारी प्रशासनिक क्षेत्रय धासा नेवाः त म्हो जक जूगु नि थुकि नेवाः तयेगु उपस्थिति जुइमागु आवश्यकता दु धया दिल । 

पुलाम्ह पत्रकार भाजु धर्मरत्न शाक्यजुं उबलेया राजमति पिथनागु स्थिति व थौंकन्हययागु स्थितिया बारे थगु अनुभव कना दिल । 

अथेहे पत्रकार भाजु सुनिल महर्जनजुं नेवाः तयसं हे नेपालभाषाया पत्रपत्रिका, एफएम, टेलिभिजनय् च्यूता तया च्वंगु मदु धैदिसें नेवाः तयसं हे च्यूता मतल धासा थ्वः भाय् व नेवाः जाति हे इतिहासं लोप जूइत भगवान नं पने फैमखुगु व अथे मजुइकेत नेवाः तयसं तिब बिमाल धैदिल । 

अथेहे पत्रकार भाजु राजु नापितजुं नेवाः तयसं नेवाः पत्रकार तयत हपाः छत्ति हे बिया च्वंगु मदु । थथे जुया च्वंगु नि सञ्चारमाध्यमय् नेवाः पत्रकार त म्वाये थाकुगु दसि सगरमाथाटिभिं क्यना च्वंगु धैदिल । न्हापायागु इतिहास जक मखु आः छु याना वनेगु धैगु विचा याये माल धका वयक न धया दिल । 

दक्वसिवे लिपा नेवाः पत्रकार दबूया नायो भाजु श्रीकृष्ण महर्जनजुं नेवाः पत्रकारपिन्स राज्यपुनर्सरचना खँय् पहिचान सहितया संघीयताया पक्षय भूमिका म्हितेमागु व उकिं नेवाः तयेगु स्थिति व नेवाः पत्रकारिता ख्यः थकाइ धया दिल । अनलिपाः भाजु सुरज ब्यञ्जनकारजु सुभाय बिया दिसे ज्याझ्वः क्वचाल । उकि लिपा तुच्चा या ज्याझ्व न दुगु जुल । 

No comments:

Post a Comment