नेवा: स इन्टरनेट रेडियो

The Status of the radio is


Note: Please Click the play button to listen if the status is Live
Refresh the page if live and player is not responding.

Wednesday, November 12, 2014

"मोदनाथ प्रश्रितको ठेगाना खोज्दै हिंडेका पृथ्वीनारायण शाहका प्रेतहरू"

"मोदनाथ प्रश्रितको ठेगाना खोज्दै हिंडेका
पृथ्वीनारायण शाहका प्रेतहरू"

–सङ्गीतश्रोता


महाराज पृथ्वीनारायण शाहसँग
जम्काभेट भयो एक गणतान्त्रिक साँझमा
अचानक कीर्तिपुर पाँगा दोबाटोमा !

मैले सोधें–
बाजे महाराज ! तिमी फेरि कीर्तिपुरै आयौ ?
उहिल्यै काटिगएका थियौ किपु–ज्यापुका नाक–कान
के तिमी फेरि पुरानै खुकुरी लिएर आइपुग्यौ ?
मेरो ठाड्ठाडो प्रश्न सुनेर पनि
शालिन देखिए बाजे महाराज
र भने– ‘बाबु, यो गोर्खे–खुकुरीको जमाना होइन
अब कालु पाँडेको कलाले मात्रै पुग्दैन
त्यसैले बोकिहिंडेको छु मैले झोलामा
रातो ल्यापटप र नीलो इन्टरनेट डिभाइस
नेपाल एकीकरण सिरिएलका पहेंला पटकथा
गोर्खाली वीरताका खैरा डकुमेन्ट्रीहरू
हातहातै फेसबुक चलाउन चिल्ला मोबाइलहरू...
सँगसँगै छन् आइएनजिओका शोध–निष्कर्षहरू
राष्ट्रिय कानुनका अद्यावधिक विधेयकहरू
पिएचडीका प्राज्ञिक प्रतिवेदनहरू
र मिडियाका सामाजिक सर्वेक्षणहरू
यिनै त हुन् यो युगका धारिला हतियारहरू !’
यति भनिसकेर महाराज पृथ्वीनारायण
मेरो नजिकै आएर सोधे–
‘बाबु, कहाँनिर छ कमरेड मोदनाथ प्रश्रितको चिहान ?
म उनैलाई दिन आएको हुँ यी सारा उपहारहरू ?’
मैले भनें–
‘मोदनाथ प्रश्रित त अझै जीवित छन् बाजे
थानकोटतिर बसेर सायद
उनी लेखिरहेका होलान् ‘नयाँ दिव्योपदेश ।’’
जवाफमा चर्को खित्का सुनियो
कीर्तिपुर पाँगा दोबाटोमा
र अचानक गायब भए महाराज पृथ्वीनारायण
तर भोलिपल्ट बिहानै
मनुस्मृति गाइरहेका भेटिए थुप्रै मोदनाथ प्रश्रितहरू
कोही सिंहदरबारको आँगनमा
कोही संसदभवनको पिंढीमा
कोही सर्वोच्च अदालतको ढोकामा
र कोही चौथो अङ्गका मझेरीहरूमा ।

२०७१ असार ११, कीर्तिपुर, नगाऊ
(‘नेपाल’ साप्ताहिकको २०७१ कात्तिक ३० को अंकमा प्रकाशित ।)




 photos taken from different sites.

No comments:

Post a Comment